Mitohy ny asa ratsin’ireo dahalo ao amin’ny distrikan’i Betafo. Omby miisa roa indray no lasan’ny andiana dahalo izay tsy fantatra ny isany nirongo basy vita gasy tao amin’ny tanàna antsoina hoe Soavina, fokontany Ambohidrano, distrikan’i Betafo ny faran’ny herinandro teo. Nanapoaka basy imbetsaka ireo olon-dratsy mba ampitahorana ireo lasibatra. Etsy ankilany koa dia tsy nisy sahy nihetsika ireo fokonolona fa samy nipirana tao an-tranony avy. Nandritra izany fanafihana izany dia lasan’ny dahalo ny ombin’ny mpamboly iray. Nampandre ny zandarmaria ireo fokonolona ary nisy fanarahan-dia. Fotoana fohy dia nifanehitra ny roa tonta ka nisy ny fifampitifirana. Dahalo iray naratra mafy nandritra ny fifanjevona fa mbola afaka nandositra. Tsy nisy kosa ny aina nafoy na naratra tamin’ireo mpanara-dia. Tafaverina daholo ireo omby roa ary nomena ny tompony.