Hagagana tsy nisy ohatra izany ny an’ireo mpandalo tao amin’ny fokontany iray ao amin’ny kaominina Ambohimanambola ny andron’ny alatsinainy teo raha nahita ny fatin’ny zaza menavava sahabo telo volana any ho any mifono lamba tao anaty fanariana rano maloto sy fako. Nitsingevana tao anatin’io rano maloto io no hitan’ny olona iray izay handeha hanary izany.

Tombanan’ny maro fa ny reniny mihitsy no nanary io zaza io, fa tsy hoe nisy namono akory. Mbola tsy fantatra kosa hatreto ilay reny nahavanon-doza na ny antony nahatonga azy hanary ny menaky ny ainy. Tsy nisy sahy nikitika ilay fatin-jazakely fa tora-kovitra avokoa ireo izay nahita izany. Tamin’ny fotoana nandalovanay teny an-toerana dia mbola tsy nisy naka ny fatin’ilay zazakely na dia efa nampandre ny tompon’andraikitra mahakasika izany aza ny fokonolona.  Mampametra-panontaniana ny maro ihany io tsy fandraisana andraikitra nataon’ny sampan-draharahan’ny mpamonjy voina sy ny sampana Bmh io.

Laurena Nany