Noho ny fanamboarana trano tsy manaraka ny fenitra tao amin’ny fokontany Mangarivotra ao Mahajanga dia ankizilahy 10 taona no naratra mafy nianjeran’ny parpin, omaly maraina tamin’ny 10 ora. Sombina « parpin » avy teny amin’ny fara-tampon’ny trano iray mbola an-dalam-panamboarana no nianjera tamin’io ankizilahy io. Ity farany izay nilalao bisikileta teo amin’ny manodidina io toerana io no niantefan’ireo biriky miampy simenitra efa maina avy nandalorana. Maherin’ny 30 eo no eo ireo biriky parpin ireo araka ny filazan’ny loharanom-baovao. Vokany, naratra ny tanan’ilay ankizilahy ary nentina avy hatrany teny amin’ny hopitaly Androva mba hahazo fitsaboana. Tamin’ny fitarafana natao ny tanan’ilay ankizilahy kely dia hita fa tena voa mafy tokoa izy. Manoloana io voina nahazo ny zanany io dia nametraka fitoriana teny amin’ny polisim-pirenena any an-toerana ny ray aman-drenin’ilay zaza ary tsy manaiky mihitsy raha tsy ampiharana amin’ireo tompon’io trano amboarina io ny lalàna. Tamin’ny fanadihadiana nataon’ny polisy dia fantatra anefa fa tsy manaraka ny fenitra ny fanamboarana io trano io.

Laurena Nany