Mangataka ny hanamafisan’ny fitandrona ny filaminana sy ny fanaraha-maso ny manodidina ny Météo-Ampasampito ireo mponina eny an-toerana manoloana ny tsy fandriampahalemana izay manjaka andro aman’alina amin’iny toerana iny. Tsy mifidy fotoana amelezana intsony ireo mpanao sinto mahery. Omaly tokony tamin’ny 10 ora sy sasany dia tovovavy iray 16 taona no lasibatr’ireo olon-dratsy ka ny finday avo lenta teny an-tanany no voaroba nanoloana ny tranom-piantohana Mama. Nikikiaka niantso vonjy ilay tovovavy ka nanenjika ilay olon-dratsy avy hatrany ireo mpitandro filaminana nandamina ny fifamoivoizana. Noho ny findrafindran-tanana nataony tamin’ireo namany anefa dia tafaporitsaka ilay nangalatra ary tsy nisy azo natao mihitsy. Araka ny filazan’ireo mponina eny an-toerana dia mamely mafy tokoa ireo olon-dratsy rehefa harivariva manomboka amin’ny 7 ora iny indrindra fa eny amin’ny tambohon’ny sekoly IST hivoaka ny siniben-dranon’ny teknika. Manao andiany izy ireto ary ny iray mody mijanona eo am-pototry ny tohatra ambany, ireo namany kosa ery an-tampon’ny tohatra ary mifanome baiko fotsiny rehefa mahita olona dia mamoaka antsy lavalela ary manafika avy hatrany. Laurena Nany