Mahazo vahana ny asan-jiolahy ao Ambatondrazaka. Trano telo tsy mifanalavitra no nasesin’ny jiolahy notafiana ny alin’ny zoma hifoha sabotsy teo, tamin’ny 1 ora tany ho any tao Tanambao. Nanao andiany izy ireo niaraka tamin’ny basim-borona sy zava-maranitra. Nanapoaka basy imbetsaka ireo olon-dratsy mba ampitahorana ny manodidina tsy hanohitra azy ireo. Tamin’ny trano voalohany dia novakian’izy ireo ny varavarana ary nanao tifitra variraraka vantany vao tafiditra tao. Olona iray naratra mafy ary lasa ny vola rehetra tao amin’ilay trano fa mbola tsy fantatra ny isany. Tamin’ny trano faharoa indray dia mpandraharaha no nidiran’izy ireo an-keriny ka lasa ny volamena 10 grama sy vola  9 tapitrisa ariary fa tsy nisy kosa ny aina nafoy na naratra tao. Nitohy tamin’ny trano iray hafa indray izany fanafihana izany. Mitovy hatrany ny fomba fiadin’ireo mpangalatra. Fa tamin’ity farany dia tsy nandrahona ireo lasibatra hamoaka ny fanany intsony izy ireo fa efa vonona izany ka nanjifa ny vola 1.2 tapitrisa ariary. Vetivety  ny nanaovan’izy ireo ny fanafihana araka ny vaovao voaray. Efa mandeha ny fanadihadiana amin’izao fotoana izao.

Laurena Nany