Voasambotry ny mpitandro filaminana ny zoma 7 aogositra lasa teo i Michelin sy Delin  izay tovolahy malaza amin’ny fanafihana mitam-piadiana ary anisan’ireo nandray anjara tamin’ny fanafihana trano fandraisam-bahiny sady toeram-pisakafoanana amin’iny lalam-pirenena faha-5 iny ny alin’ny 15 jolay hifoha 16 jolay lasa iny. Fito lahy izy no nanantanteraka ny asa ratsy tamin’izany fotoana izany ary maty notsatohan’izy ireo antsy ny mpiambina ilay toerana ny alin’io.

Nitondra fiara ireo jiolahy nandritra ny fanafihana ka lasa daholo ny entana rehetra lafo vidy tao. Tsy niandry ela anefa fa vantany vao nivoaka ilay toerana ireo jiolahy dia niantso ny FIP ny mpahandro iray tao amin’io trano fandraisam-bahiny io. Tsy mbola lasa lavitra izy ireto ka vetivety foana dia nifanehitra tamin’ny mpitandro filaminana. Avy hatrany anefa dia nandositra tany anaty kirihitr’ala ireto jiolahy ary navelan-drizareo teo ilay fiara sy ny entana rehetra avy norobainy. Nitohy ny fikarohana ary voasambotra tao Toamasina II izy roa lahy voalaza etsy ambony, izay mbola tsy ampy taona akory ny iray. Mbola karohina ny dimy ambiny.