Nahatonga saina ny maro ny tsy fahitana ny tovolahy vao 18 taona monja tsy nivezivezy tao Tanambaovao, fokontany Tananambo, kaominina Fanandrana ao anatin’ny distrikan’i Toamasina rehefa andro maromaro. Taorian’ny fikarohana nataon’ny mpitandro filaminana dia fantatra fa maty nisy namono io tovolahy io ary tratra nanaraka izay ihany koa ireo tompon’antoka tamin’izany. Rehefa nohadihadiana izy ireo dia nilaza ny marina rehetra sy ny toerana nandevenana an’io tovolahy io. Tamin’ny fanazavana nentin’ireo nahavanon-doza dia maty nofirain’izy ireo ny antsy ny alin’ny talata 4 aogositra, tamin’ny 9 ora sy sasany tany ho any ilay tovolahy noho ny kakay nisy tamin’izy ireo. Rehefa maty dia nalevin-dry zalahy ny alin’io ihany tamin’ny toerana voalaza etsy ambony. Nidina teny amin’ilay toerana nandevenana an’ilay tovolahy ny mpitandro filaminana niaraka tamina dokotera ary  nofongarina tao ilay razana. Tamin’ny fitiliana nataon’ny mpitsabo dia voamarina fa nofiraina ny antsy tokoa io tovolahy io ka izay no nahafaty azy. Natolotra ny fianakaviany ny zoma 7 aogositra lasa teo ny razana ary efa nalevina ao am-pasan-drazana.

L.N