Mpandeha enina no naratra mafy ary mbola miady amin’ny fahafatsesana amin’izao fotoana izao. Io no vokatry ny lozam-pifamoivoizana nitranga tamin’ny lalam-pirenena faha-9 iny, 40 km avaratr’i Toliara  hihazo an’Ankililoaka ny faran’ny herinandro teo. Fiara roa, Mutsibishi ny iray, raha kamiao mpitatitra entana nitondra vary sy « balles friperie » kosa ny faharoa. Ireto fiara roa ireto dia samy latsaka tao anaty lavaka be ampovon’arabe tamin’ny andro alina, amin’ny lalana amboarin’ny Sinoa, ary potika tsy nisy noraisina. Tsy kely lalana tokoa  ny ratsy, 30 minitra taorian’ny nitrangan’ny lozam-pifamoivoizana dia nisy nandroba ireo entana tao anatin’ilay fiara be ka very tamin’izany ny vary fotsy 50 gony sy « balles friperie » maromaro.

Mamo ny mpamily, nandeha mafy

Raha ny fanazavan’ny mpamily dia tsy nisy takelaka famantarana ny fivilian-dalana tamin’io toerana nisehoan’ny loza io, ka ny fiara tafalatsaka tao anaty lavaka vao samy taitra ny rehetra. Nanda ny fanosoram-potaka atao amin’ny orinasa China Railway ho tompon’andraikitra nahatonga ny loza, ny talen’ity orinasa sinoa manamboatra ny RN9 ity, raha nitafa tamin’ny mpanao gazety, omaly. « Misy « panneaux de signalisation » avokoa isaky ireo toerana an-jatony lavahana hanamboarana tatatra fanarian-drano na « dalot ». Misy mangalatra ireo takelaka famantarana nefa soloanay avy hatrany mba ho fiarovana ny ain’ny mpampiasa lalana », hoy James Guo. Sodokan’ny hatsaran’ny lalana ireo mpamily, ao ny mandray alikaola, dia mandeha mafy, nefa ny ankamaroan’ireo fiara mivezivezy efa antitra sy konka tsy ampy fikojakojana.

Eric Toliara