Loza mahatsiravina no niseho tetsy Andavamamba omaly maraina tokony tamin’ny 9 ora tany ho any. Trano iray teny an-toerana no may ravan’ny afo ary zaza iray no may kila tao.

Tsy fantatra mazava hatreto izay antony nahatonga ny fahamaizana fa araka ny fanazavan’ny manodidina dia efa afo nijoalajoala no hitan’izy ireo nivoaka avy tao amin’ilay trano. Nikoropaka ireo mponina vao nahatazana izany ary niantso ny mpamonjy voina avy hatrany fa mandra-pahatongan’ireto farany dia ireo mponina no niezaka namono ny afo. Ny rivotra ihany koa nitsoaka mafy ka nampanano sarotra ny famonoana ny afo. Nandritra izany no nahafantarana fa nisy ankizy kely tavela tao amin’ilay trano raha nihevitra ny rehetra fa tsy nisy olona intsony. Efa ilay zaza nitomany mafy tokoa no nahalalana ny fisiany tao. Araka ny fantatra dia nandeha niantsena ny ray aman-drenin’ity zaza ity ka nohidiny tao an-trano izy mba tsy handehandeha ety ivelany. Raikitra ary ny famonjena an’ilay zaza kanefa noho ny hamafin’ny hidim-baravarana dia tsy tafiditra ireo hanavotra azy.Tamin’ny fotoana nahavoavaha ny varavarana dia efa vatana mikarainkona sisa no hany navelan’ny afo tao an-trano.

Laurena Nany