Taorian’ny fikarohana nataon’ny polisim-pirenena ao Toamasina dia sarona ireo mpanendaka atao hoe tarika bodifotsy. Ireto farany izay tompon’antoka tamin’ny famonoana lehilahy iray 49 taona mpanamboatra fahitalavitra sy kojakoja elektronika ny alin’ny talata 4 aogositra hifoha 5 aogositra lasa teo.

Avy nanamboatra fahitalavitra tao Valpinson ity lehilahy no nifanehitra tamin’ny mpanendaka telo lahy. Tsy nisy alaharo alaharo fa avy hatrany dia  notsatohan’ireo tsy mataho-tody ny antsy ny tendan’ilay lasibatra ka maty teo no ho eo ary lasan-dry zalahy tamin’izany ny vola 15 000 ariary. Rehefa nandeha ny fikarohana, tsy niherina akory ny andro nisian’ny famonoana dia saron’ny polisim-pirenena ireo tompon’antoka tamin’izany ny 6 aogositra teo ary mbola tratra niaraka tamin’izy ireo ilay antsy be fampiasa amin’ny asa ratsy ary mbola nisy ra. Ireto farany izay fantatra amin’ny anarana hoe tarika bodifotsy ary manana « secteur » mihitsy amin’ny fanendahana ao amin’ny fokontany Mangarivotra sy Ankirihiry.