Taorian’ny fikarohana nataon’ny zandary tao Mahajanga dia jiolahy miisa dimy no sarona ary efa naiditra am-ponja ny 12 aogositra. Ireto farany izay voarohirohy ho tompon’antoka tamin’ny fanakanan-dalana mpivady nandeha môtô teny Namakia ny marainan’ny alahady 2 aogositra lasa teo, tamin’ny 7ora.

Mpivarotra volamena izy mivady ireo ary nosakanan’ny jiolahy efatra mirongo fitaovam-piadiana mahery vaika. Nisaron-tava ny telo tamin’izy ireto nandritra ny fanafihana raha toa ka tsy nanao izany ny iray ary fantatr’izy mivady tsara satria olona akaiky azy ireo ihany. Nandeha kodiaran-droa moa ny iray hafa tamin’ireo jiolahy izay nialoha lalana ireo mpivady ary nisioka mafy be ity farany avy eo mba hanairana ireo namany izay efa niandry fotsiny. Nofatoran’ireo olon-dratsy teo amin’ny vava, tanana ary tongotra izy mivady. Lasa tamin’izany fanendahana izany ny vola, ny volamena ary volafotsy mitentina 8 tapitrisa ariary.

Tamin’ny nahatratrarana an’ireto jiolahy dia sarona ny basy poleta, bala fampiasa amin’ny basim-borona miisa efatra, ody gasy. Niaiky ny heloka ny iray tamin’izy ireo nandritra ny famotorana izay nilaza fa mpamatsy fitaovam-piadiana ny telo amin’izy ireo ary mpanantanteraka kosa ny ambiny.