SourceURL:file://localhost/Users/intelmini2/Desktop/Web_matin_1844/maraina/Tsiroanomandidy.doc

Tsiroanomandidy

Olona telo namoy ny ainy tamin’ny fanafihan-jiolahy

Olona telo indray no namoy ny ainy vokatry ny fanafihan-jiolahy tao Mahasolo ao anatin’ny distrikan’i Tsiroanomandidy ny alin’ny zoma lasa teo, tamin’ny 8ora tany ho any. Tena nofy ratsy tanteraka no niainan’ireo mponina tao an-toerana.

Magazay iray no nidiran’ireo andian-jiolahy an-keriny ka lasa ny vola voaangona nandritra ny telo andro. Tsy vitan’izany fa mbola niharan’ny tifitra ihany koa ny tompon’ny toeram-pivarotana ka naratra mafy. Rehefa nandositra ireo jiolahy dia nisy fanarahan-dia nataon’ny fokonolona ka nitifitra indray ireo olon-dratsy ary lavo tamin’izany ny roa tamin’izy mpanara-dia ka nampihemotra azy ireo. Tsy nijanona teo anefa ireo mpanafika fa nandroba mpivady mpanangom-bokatra indray izay monina tsy lavitra teo. Notifirin’izy ireto izy mivady nandritra ny fandalovany ka naratra mafy ary lasa ihany koa ny vola 15 tapitrisa ariary mahery.

Rehefa niala tao amin’izy mivady ireo jiolahy dia nifanehitra tampoka tamina kamiao iray. Tsy nisy alaharo alaharo fa notifirin-dry zalahy ilay mpamily ka dia maty tsy tra-drano. Efa mandeha ny famotorana ataon’ny mpitandro filaminana amin’izao fotoana izao hikarohana ireo nahavanon-doza.

L.N