Mitohy ny fikarohana an’ilay zazakely 5 taona izay latsaka tao anaty renirano ao amin’ny distrikan’i Ambatondrazaka. Efa ny alakamisy teo no fantatra fa latsaka tao amin’ny renirano lehibe avy teny amin’ny tetezana Andromba, ao anatin’ny kaominina Andromba io zazakely io fa mbola tsy nahitana ny vokany ny fikarohana nataon’ireo mpamonjy voina hatramin’izao.

Niaraka tamin’ny reniny ilay zaza tamin’ny fisehoan’ny loza. Nandeha teo amin’ilay tetezana izy mianaka raha niditra ny fiara iray. Natahotra ilay zaza raha nahita ity fiara ka nitsoaka izy mianaka kanefa tsy tanan’ny reniny izy hany ka latsaka tany anaty renirano tany. Efa very fanantenana tanteraka ny fianakavian’ilay zaza amin’izao tsy nahitana ny fatiny izao. Araka ny vaovao voaray avy any an-toerana dia misy faritra tena lalina amin’io renirano io ary mety latsaka mifanandrify amin’io faritra voalaza io ilay zaza ka manano sarotra ny fitadiavana azy.

L.N