Tao amin’ny reniranon’i Antananagnambo, ao amin’ ny fokontany Ambolibe ao anatin’ny distrikan’i Antalaha no nisehoan’izany. Ny alakamisy 20 aogositra atoandro no hitan’ny olona farany ity ramatoa ity nandeha nanatitra ny zanany hihazo ny tanànan’i Antalaha ka niampita izany renirano izany ka tsy niverina intsony. Akory ny hatairan’ny olona iray handeha hanasa vilia sy vilany tamin’izany renirano izany ny marainan’ny zoma 21 aogositra raha nahita ny fatiny natsingevan’ny rano. Nampandre ireo tompon’andraikitra avy hatrany ity farany ka nidina teny an-toerana izy ireo nijery ny razana. Tamin’ny fizahana nataon’ny dokotera dia fantatra fa nilentika tanaty rano no nahafaty an’io ramatoa io. Nahenoana fofon-toaka ihany koa io ramatoa io dia izay no nahafaty azy. Raha nilomano hody hihazo an’ny Ambolibe io vehivavy io dia navadiky ny rano. Tamin’ny fanambaran’ny manodidina dia efa mpisotro toaka mihitsy izy ary tsy vao sambany izao zava-misy izao fa efa fanindroany saingy tamin’ny voalohany izy nisy nahita ka avotra. Natolotra ny fianakaviany ny razana.