Ny alin’ny alatsinainy hifoha talata no nisehoan’izany tao amin’ny fokontany Besopaka ao anatin’ny distrikan’i Sambava. Jiolahy miisa telo mirongo fitaovam-piadiana sy zava-maranitra no nanafika ny tranon’ny mpandraharaha lavanila iray ao an-toerana. Nanao tifi-danitra avy hatrany ireo olon-dratsy vao tonga teo ambavahadin’ilay lasibatra mba ampitahorana ny manodidina. Nopitsohan’izy ireo ny varavarana ary vantany vao tafatsofoka tao an-trano dia nandrahona ny tompon-trano hanome ny vola ao aminy. Ity farany kosa tsy nety nanome fa nanohitra ireo tsy mataho-tody ka notsondrimin’izy ireo ny antsy teo amin’ny kibony. Naratra mafy ilay mpandraharaha ka tsy nahatohitra ireo jiolahy intsony ka nanamora ny fangalaran’izy ireo ny vola sy ny fananany. Tamin’izany fandrobana izany no  lasa ny vola mitentina 20 tapitrisa ariary vidin’ny lavanila azo ny androtr’io sy vokatra milanja 2 taonina.

Teo anelanelan’izany dia efa nampandre ny mpitandro filaminana ireo mponina manodidina ka nidina teny an-toerana ireto farany. Vao nahatazana ny fahatongavan’ny polisy ireo jiolahy dia vaky nandositra fa tratra ny roa tamin’izy ireo raha toa ka tafaporitsaka ny iray. Tamin’ny fanadihadiana no nilazany fa efa nahatsikaritra ny fisian’ny vola tao amin’io trano io izay vidina lavanila izy ireo. Mitohy ny fikarohana ny jiolahy namany iray afa-nandositra.