Nisehoana lozam-pifamoivoizana mahatsiravina indray ny lalam-pirenena faha-34 ny talata tamin’ny 7ora hariva lasa iny. Fiara taksiborosy iray no nivadika ambony ambany rehefa niditra ny tananan’i Soanafindra ao anatin’ny distrikan’i Miandrivazo. Olana ara-teknika no fantatra fa nahatonga ny loza tamin’io fotoana io. Tapaka tampoka mantsy ny hisatr’ilay fiara ka nahatonga ny mpamily tsy nahatana  ny familiana intsony. Vehivavy iray 46 taona no maty tsy tra-drano tamin’izany raha toa ka naratra mafy daholo ireo mpandeha tao amin’izany fiara izany. Nisy ny tapaka tanana sy tongotra, tao ihany koa ireo torana tsy nahatsiaro tena noho ny dona mafy nihatra tamin’izy ireo. Nentina avy hatrany tany amin’ny hopitaly ireo naratra ary natolotra ny fianakaviany kosa ny razana taorian’ny fizahana nataon’ny mpitandro filaminana sy ny mpitsabo.

L.N