Nahitana karazana baomba kely vita tanana tao amin’ny “parking” akaikin’ireo birao fiasana ao amin’ny Ozininan’Ambatovy Toamasina, ny alin’ny sabotsy 22 aogositra 2015. Araka ny fanambaran’Ambatovy natao ny alakamisy 27 aogositra lasa teo, dia tsy nipoaka izy io, ary efa voahaisotra soamantsara tamin’ny toerana misy ny “parking”nahitana izany tao amin’ny ozinina. Manoloana izany tranga izany, dia manamafy kosa Ambatovy, fa tsy naharay fandrahonana, na fitakiana mifandraika tamin’ny fahitana io baomba vita tanana io akory hatramin’izao. Efa eo am-pelatanan’ny mpitandro filaminana, ny zandarimariam-pirenena izany, izay efa manana fifanaraham-piaraha-miasa amin’ny orinasa Ambatovy, ka nandray an-tanana ny fanadihadiana  lalina ny antony nisian’ity baomba vita tanana ity. Koa hita eo ihany ny tohiny. Fanontaniana mipetraka ao an-tsain’ny maro ny hoe : misy ifandraisany amin’ny fampiantona ireo mpiasan’Ambatovy ve izao ny nahitana baomba vita tanana tao anatin’ny toerana misy ny Ozinina ao Toamasina izao?

ZOUZOUH Toamasina