Tovolahy iray mivarotra eny Ambodin’Isotry no nisy naka an-keriny teny an-toerana ny zoma atoandro lasa teo. Nandeha tongotra teny an-dalana ity farany no fantatra fa narahin’ny andian-jiolahy tao anaty fiara. Miisa enin-dahy izy ireo, ny sasany tamin’ireo jiolahy nivoaka ny fiara ary avy hatrany dia nibata sy nanery azy hiditra tao anaty fiara. Noho ny tahotra  loatra anefa dia tsy sahy niantso vonjy ilay lasibatra. Ny teo amin’ny manodidina ihany koa nilaza fa tsy nahatsikaritra na inona na inona. Tsy nisy ihany koa ny fitakiana vola tamin’ny fianakavian’ilay tovolahy.

Efa hariva anefa ny andro izay ny havany vao taitra tamin’ny tsy fahatongavana tao an-trano. Nampandre ny mpitandro filaminana ireto farany ary nandeha ny fikarohana azy fa niala maina ny rehetra. Ny alin’io ihany dia hitan’ny olona teny amin’ny faritra Anosizato ilay tovolahy ary efa niboridana tanteraka. Ny ankajony, ny kirarony, ny vola niaraka tamin’ny finday dia lasan’ireo jiolahy avokoa. Araka ny filazany dia natsipin’ireo olon-dratsy teny amoron-dalana izy rehefa azon’izy ireo izay nilainy fa tsy novonoiny. Voamarina izany tamin’ ny vatana izay tsy nahitana ratra mihitsy.