Kely foana no tsy nanaraka ny ain’ilay jiolahy tany Ambilobe. Ity farany izay tratran’ny fokonolona ambodiomby nangalatra solika teny amin’ny tobin’ny Jovenna any an-toerana. Ny alin’ny sabotsy teo no nitrangan’izany. Araka ny fitantaran’ireo nanatri-maso dia avy amin’ny kamiao mpitatitra solika iray nijanona teo amin’ny toby fivarotan-tsolika no nangalaran’ity mpangalatra ity. Nanararaotra ny fijanonana ela teo ity tovolahy ity hanaovany ny asa ratsiny ary efa tetika maty paika izany satria ankeviny efa nandrasany mihitsy ny fahatongavan’ilay fiara. « Mahazo vahana ny bizina solika any an-toerana amin’izao fotoana izao ka mety izay no nahatonga ity jiolahy ity hangalatra solika tahaka izao », hoy ny loharanom-baovao avy any an-toerana. « Voapepo marotoa ny tanany sy tongony ary ny lohany », hoy hatrany ny loharanom-baovao. Tonga ara-potoana teny an-toerana ny mpitandro filaminana nanala ilay lehilahy tamin’ireo fokonolona ary nentina notsaboina teny amin’ny hopitaly ao an-toerana noho ny ratra mafy nahazo azy.

L.N