Ny alin’ny alakamisy 27 aogositra lasa teo no hitan’ny olona farany tao ambanivohitra Namoana, ao anatin’ny distrikan’Antalaha ny ramatoa iray 45 taona. Nandeha namonjy alim-pandihizana no nialany tao an-trano ary tsy niverina intsony izy avy eo. Rehefa nampandre ny mpitandro filaminana ny fianakaviany ny ampitso zoma dia nandeha ny fikarohana  nefa niala maina ireto farany.

Ny alahady maraina anefa dia akory ny hatairan’ny tantsaha iray raha nahita ny fatina vehivavy teo amin’ny tanimbariny raha sendra nangady teo izy. Nampandre ny manodidina avy hatrany sy ny sefom-pokontany ary ity farany kosa niantso ny zandary. Nidina teny an-toerana ny mpitandro filaminana niaraka tamin’ny mpitsabo hijery ny razana. Tamin’ny fizahana natao dia fantatra fa maty nisy namono ity ramatoa ity.  Araka ny filazan’ny mpitsabo hatrany dia naolana io ramatoa io ary avy eo novonoina. Nahitana diana antsy sy dian-tanana teo amin’ny faritry ny tendany.

Nampanantsoana  manaraka izay ihany koa ny fianakaviana nanana havana very ka rehefa nojeren’izy ireo ilay razana dia ilay ramatoa havany tsy hita tokoa. Natolotra ny fianakaviana ny razana taorian’ny fizahana. Misokatra ny fanadihadiana.

Laurena Nany