Taksibe roa marika Sprinter, samy nandeha mafy, no nifandona teny amin’ny lalana digy tao Andohatapenaka, ny sabotsy lasa teo tokony ho tamin’ny 6 ora maraina. Ny iray mampitohy ny renivohitra an’Ambohitrimanjaka ary ny iray an’Ivato. Saika hisongona ny fiara teo alohany ilay taksibe mampitohy an’Ambohitrimanjaka no nifatratra tamin’ilay taksiben’Ivato, nifanena taminy. Niezaka niala ihany iry voalohany saingy tsy azo nihodivirana  ny fifandonana. Niafara tamin’ny fivadihan’ilay fiara iray izany. Mpandeha miisa sivy no indray naratra, ary ny roa tena voa mafy tamin’ity loza ity. Nentina namonjy toeram-pitsaboana avy hatrany izy ireo ary mbola tazomina ao amin’ny sampam-pameloman’aina ireo roa voa mafy ireo.

Ny andron’io sabotsy io ihany, dia taksiborosy amin’ny zotra nasionaly iray, izay mbola marika Sprinter ihany, no nitrosona sy naharatrana olona maromaro tany amin’ny lalam-pirenena Rn7, tokony ho tamin’ny 1 ora atoandro. Raha ny fanambaran’ny zandary misahana ny fifamoivoizana, tao Behenjy, dia hitodi-doha ho any Antananarivo ity fiara ity io namoa-doza io, ary nisongona kamiao no nahatonga izany. Nilatsaka tamin’ny sisin’arabe anefa ilay fiara ka vaky ny kodiarana izay nitarika ny fivadiahany. Mpandeha valo no naratra.

L.N