Nivoaka omaly tamin’ny 4 ora maraina ny voka-panadinana bakalorea tao Toliara. Nahatratra 27,77% ny taham-pahafahana, ka ambony indrindra tamin’izany ny sokajy C 50,60% arahin’ny sokajy A1 (46,09%). Ny sokajy A2 (25,21%), ny sokajy D (29,23%), ary ny teknika kosa 52,09%, ka ny sampana TMA no nahazo taham-pahafahana ambony indrindra 79,17%. Niisa 13 778 ny mpiadina nanatanteraka ny bakalorea tany anatin’ny faritanin’i Toliara izay nitsinjara tamina toeram-panadinana miisa 19.

Hentitra ny fanaraha-maso

« Tara ny fivoahan’ny voka-panadinana tamin’ity taona ity, satria hentitra ny fanaraha-maso mba hiadiana amin’ny kolikoly sy hisian’ny mangaraharaha tanteraka », hoy ny filohan’ny oniversiten’i Toliara, Pr Dina Alphonse. Ratsy ihany koa, hoy izy, ny taham-pahafahana bakalorea 2015, raha oharina tamin’ny taon-dasa (43,04%). Izany hoe : latsaka 15,27% be izao. Antony maro no mahatonga izany. Eo ny tsy fahampian’ny mpampianatra sy ny faharatsian’ireo fotodrafitrasam-pampianarana, satria mbola misy mpianatra amina lycée sasany miladina an-tany (tsy misy tabilio). Eo ihany koa ny « discipline » goragora ka misy fiantraikan’ny ratsy amin’ny voka-panadinana.

Eric Toliara