Fiara fitaterana iray avy aty an-drenivohitra no tra-doza rehefa tafiditra teo antampon-tanan’i Mahajanga, tao amin’ny fokontany Ambalakida, ny alahady hifoha alatsinainy, tokony ho tamin’ny misasak’alina tany ho any. Niala olona adala natory teny ampovoan-dalana no nahatonga ny loza.

Nivadika ambony ambany ilay fiara ka maty tsy tra-drano ny olona 3. Nentina tao amin’ny hopitaly tao an-toerana kosa ireo naratra ka namoy ny ainy ny mpamily ilay fiara rehefa tonga kelikely tao. Iray hafa maty omaly maraina.

Anisan’ireo namoy ny ainy tamin’ity lozam-pifamoivoizana mahatsiravina ity, i Valery Gamal, izay tovolahy mpanentana ao amin’ny fahitalavitra Viva any Mahajanga. Avy nanentana lanonam-panambadiana taty an-drenivohitra io tovolahy io izao tra-doza izao rehefa nitodi-doha tany Mahajanga. Araka ny vaovao voaray ihany koa, atao raharaha amin’ny zoma ho avy izao  io lehilahy io izao maty izao.