Soa fa mba tafajanona tamin’ny segondra farany ny fiara R11 fa raha tsy izany dia mety efa lasan-ko razana avokoa izy mianakavy. Hanatrika fampiakaram-bady tao Antogona Imerintsiatosika izy ireo, ny sabotsy teo, no niseho ny loza. Nanaraka filaharan’ny fiara na « cortège » saingy tsy tafakatra fiakarana nohon’ny vesatra noentiny ka voatery nihemotra mba haka bahana. Ny mpandeha iray nipetraka tao aoriana, izay sendra nitodika, no nahita ny rambon’ny fiara izay efa saika lasa tany anaty hantsana vao nikoropaka avokoa ny rehetra.

Tena divin-janahary no tsy nahafaty ireto mpianaka ireto. Tsy vao sambany no nisy fiara saika latsaka tao amin’io hantsana io. Efa nisy mihitsy aza ireo fiara vaventy sy sarety no efa nivarina tao, araka ny fanambaran’ny mponina tany an-toerana. Ratsy dia ratsy ilay làlana ka mahatonga ny lozam-pifamoivoizana amin’izany toerana izany.