Mpamongady iray no lasibatry ny jiolahy mitam-piadiana teny Andrefana Ambohijanahary ny sabotsy lasa teo, tamin’ny 8 ora sy sasany alina. Miisa 8 mahery izy ireo nigadona tao amin’ilay fivarotana ka avy hatrany dia nanapitsoka ny varavarana sady nanapoaka basy. Nokapohan’ireo olon-dratsy ny loha sy ny tanan’ny raim-pianakaviana vao tafiditra tao an-trano izy ireo. Tsy afa-nanohitra ity farany ka nanararaotra naka izay tiany ireo mpanafika.

Nangalarin’izy ireto avokoa ny vola tao an-tsena sy ny vola kely tahirin’ireo lasibatra ary ny zavatra sarobidy tao an-toerana. Natahotra ny ho voatafika, ihany koa, ny manodidina na dia naheno ny fanafihana aza, ka tsy nisy sahy nivoaka nanampy ireo fianakaviana lasibatra. Efa lasa lavitra ireo jiolahy izay izy ireo vao namonjy ireo voaroba sady niantso ny mpitandro filaminana. Nentina tany amin’ny hopitaly ilay raim-pianakaviana naratra avy eo fa tsy misy ahiana kosa ny ainy.

Laurena Nany