Nirehitra  ny tranon’ny pasitera iray, ao amin’ny fokontany Ampandranety, any Vatomandry ny takarivan’ny alahady, tokony ho tamin’ny 7 ora sy sasany tany ho any. Tao anatin’ny ora vitsy monja, lasa lavenona tsy nisy noraisina ilay trano, vokatry ny afo nirehitra nanakaiky ny solika. Tsy tao an-trano ry pasitera mianakavy tamin’ny fotoana nisehoan’ny loza fa mbola tany am-piangonana nampivavaka ary ny tovovavy mpanampy azy ireo ihany no tao. Niantso vonjy avy hatrany ilay mpiasa raha nahita ny fijoalajoan’ny afo nananika ny efitrano. Nifamonjena ny famonoana ny afo, saingy sarotra izany noho ny fitsokan’ny rivotra ka kila firehitra ilay trano. Tsy nisy ny aina nafoy na naratra fa potika tanteraka tsy nisy noraisina ny entana tao. Efa misokatra ny fanadihadian’ny mpitandro filaminana.