Nisy niditra an-tsokosoko ny trano fonenan’ny ben’ny tanàna voafidy ao Mahajanga, ny zoma alina lasa teo. Tsy fantatra ny isan’ireo olon-dratsy ary tamim-pilaminana tanteraka no nanaovan’izy ireo ny fanafihana. Nilaza tsy naheno ny figadonanan’ireo jiolahy ny lasibatra fa efa trano mivoha midanadana no hita ny maraina. Najifa tamin’izany ny solosaina azo entina mandeha miisa roa, finday iray, kitapo misy antontan-taratasy mahakasika ny ben’ny tanàna ary ny famataranandro atao amin’ny tanana iray.

Tsy toy ny fanafihana mahazatra ity nitranga tany Mahajanga ity ary ahiana ho misy ambadika politika izao halatra izao satria ny zavatra rehetra mahakasika ny ben’ny tanàna ihany no nalain’ireo olon-dratsy dia lasa izy ireo. Mbola tsy misy olona ahiahiana kosa nahavita izany amin’izao fotoana izao. Nidina teny an-toerana ny mpitandro filaminana nijery akaiky ny raharaha ary efa mandeha ny fanadihadiana mahakasika izany.

L.N