Miverina indray ny fanakanan-dalana eny amin’ ny lalam-pirenena. Kamiao iray sy fiara mpitatitra miisa 4 avy aty an-drenivohitra no lasibatra tamin’izany, ny zoma alina, tokony ho tamin’ny 10 ora. Nosakanan’ny andian-jiolahy maromaro nirongo basy mahery vaika sy sabatra  ary vato be ny lalana. Tamin’ny lalana mihazo ny distrikan’Ambomiadana Andramasina no nitrangan’io. Nitora-bato avy hatrany ireo jiolahy vao nandalo ilay fiara be  ka vaky tamin’ izany ny fitaratra aloha an’izany kamiao izany.

Araka ny loharanom-baovao dia io kamiao io no tena nandrasan’ireo jiolahy fa ny ambiny kosa sendra tavela tao aorianany. Mpitatitra hazo izy io ary avy nanatitra izany taty Antananarivo. Nambanan’ireo olon-dratsy basy avy hatrany ny mpamily sady nanontany ny tompon’ny fiara izy ireo. « Aiza Rakoto (solon’anarana), aiza daholo ny vola vidin’entana ? » Lasibatra nandritra ny fanafihana ny vola an-

tapitrisa vidin’ny hazo sy volan’ireo mpandeha tao anatin’ ireo fiara tao aoriana niaraka tamin’ ny finday maro.

Tsy nijanona teo fa mbola nofatoran’ireo andian-jiolahy ireo mpandeha ary novetavetain’izy ireo avokoa ny vehivavy rehetra. Naharitra ora maro ny asa ratsin’izy ireo, ka efa tamin’ny 2 ora maraina tany ho any vao navotsotr’ireo mpanafika ireto farany . Efa nentina notsaboina tany amin’ny hopitaly ireo olona ireo.

Laurena Nany