Nanatontosa ny fandrefesana ny lalam-pirenena Rn7 teo anelanelan’i Ambohimasoa sy Fianarantsoa ny ekipan’ny B.E topo raha nisy fiara iray nentin’ny sinoa tonga nanao hitsin-dalana ka nandona sy nanitsaka ankitsirano ny lehilahy iray tao anatin’ny fanatanterahana ny asany.

Nipitika tao anaty lakan-drano izay ankavian-dalana ilay voadona, ary tsy nialana nenina nentina tany amin’ny hopitaly akory fa maty tsy tra-drano. Avy any aoriana ilay fiara araka ny voalaza ka tsy nampoizin’ilay niharan-doza, ary tokony any ankavanan-dalana, ihany koa, no nandeha izany fiara izany.

Nana-pikasana hitsoaka rehefa avy nandona ireo sinoa fa tsikarit’izy ireo ny iray tamin’ireo mpiasa naka ny laharana fiara ka nijanona izy ireo. Ny talata 6 oktobra no nisehoan’izany.

Fandonana niniana natao

Rehefa avy nandona ny iray tamin’ireo mpandrefy lalana ilay mpamily dia mbola nanitsy saika hifaoka ny namin’ny maty teny ampita ihany koa. Fandonana niniana natao tsotra izao izy io, araka ny loharanom-baovao satria efa nisy ekipan’ireo mpiasa ireo tany amin’ny 6 kilometatra talohan’io toerana io saika ho domin’ireto sinoa fa nahay niala. Manahy ireo mpiasa noho izany sao dia olona mpifaninana amin’io orinasa mpanao lalana io ka dia manao izay tsy ahavitana izany satria teratany Italianina no tompon’ny asa.

L.N