Trano iray misy mpanofa maromaro no notafian’ny andian-jiolahy nitondra antsy lava sy hazo be, teny Ankaraobato Tanjombato, ny alin’ny talata hifoha alarobia omaly. Miisa 16 ireo olon-dratsy nitety ny tranon’ireo lasibatra ka mpanofa telo no noratrain’izy ireo.

Raim-pianakaviana iray 27 taona no lasa tsy nahita rehefa nanohitra ireo jiolahy ireo fa ny vadiny kosa tafatsoaka avy teo am-baravarakely. Ity farany avy eo, niantso vonjy tany amin’ny manodidina sy ny mpifanila-bodirindrana aminy. Vavy antitra iray 70 taona ihany koa no naratra teo amin’ny lohany rehefa nokapain’ireo mpanafika tamin’ny antsy lava. Araka ny fitantaran’ny loharanom-baovao dia kiraro iray sy finday maromaro an’ireo lasibatra no azon’izy ireo.

Nentina haingana tany amin’ny toeram-pitsaboana ireo naratra rehefa lasa kelikely ireo jiolahy. Tamin’ny fotoana nitondrana ireo lasibatra tany amin’ny hopitaly dia mbola niverenan’ireo olon-dratsy ilay trano, araka ny loharanom-baovao hatrany. Mbola tsy fantatra hatreto ny zavatra lasa tamin’izany.

L.N