Mahita tetika vaovao hanohizana ny asa ratsiny hatrany ireo mpangarom-paosy any amin’ny distrikan’Ambatondrazaka. Fantatra amin’izao fotoana izao fa mametraka fanafody gasy anaty lavan-tsofina indray ireo mpanao ratsy. Ary efa tsy lahy tsy vavy fa manao izany asa izany avokoa ny an-toerana. Tsy tahotra tsy henatra izy ireo misava ny paosin’ny olona izay hazainy, ka ireo mpiantsena ao amin’ny tsenan’Ambatondrazaka no tena lasibatra, araka ny loharanom-baovao.

Efa maro ihany koa ireo mpivarotra sy olona mahatsikaritra ireo mpangarom-paosy fa tsy sahy miteny, matahotra ny iharan’ny valifaty sao misy naman’izy ireo mihaodihaody manodidina eny. Fantatra tsara ny fomba fiasan’izy ireny fa tsy mba mandeha irery, misy namany foana eny amin’ny manodidina eny.

Noho izany zava-misy izany, mangataka indray ireo mponina ny hamerenana ny polisy kaominaly mba ahafahana miaro ny mpiantsena sy ny mpivarotra izay lasa mitaintaina lava amin’ny afitsok’ireo jiolahy.

L.N