Tovolahy sahabo ho 30 taona no hita faty nihantona tao amin’ny trano fonenany, ny alarobia hifoha alakamisy 29 oktobra lasa teo. Tao amin’ny fokontany Antsiradravo, any Sonierana-Ivongo no nisehoan’izany. Olana ara-pitiavana no fantatra fa antony nahatonga izany. Ireo mpifanolo-bodirindrina aminy no nahatsikaritra ny zava-misy taorian’ny tsy fahitana azy nivoaka ny tranony.

Nanahy amin’ny mety fisian’ny zavatra hafahafa ka nampandre ny sefom-pokontany izy ireo. Tonga teny an-toerana ity farany ka voatery novakiana ny varavaran’ny trano. Ilay lehilahy mihantona ary  tsy misy aina intsony no hita tao. Niantso ny mpitsabo sy mpitandro filaminana avy eo ny tompon’andraikitra nanao ny fizahana ny razana. Teo no nahalalana fa maty namono tena ilay tovolahy. Ireo mpiara-monina taminy no nitantara fa nanana olana ara-pitiavana io lehilahy io, araka ny vaovao voaray. Fantatra ihany koa fa mpiavy mila ravinahitra any Soanierana-Ivongo izy fa any Mandritsara no tena fiaviany. Tsy manana havana any an-toerana ka ireo fokonolona no nanao tsipaipaika nikarakara ny razana.

Laurena Nany