Roalahy indray no lavon’ny balan’ny miaramila mpampandry tany, tao Ambodiriana, kaominina Ivato-centre, any Ambositra, ny alatsinainy lasa teo. Nandritra ny fisafoana natao tany an-toerana, nisy andian-dehilahy miisa 6 nifanehitra tamin’izy ireo. Vaky nandositra avy hatrany ireo lehilahy ireo raha vao nahita ny mpitandro filaminana ka raikitra ny fanenjehana. Nanao tifi-danitra ireo miaramila fa tsy nijanona ireto nandositra ka voatery nitifitra iry voalohany. Voan’ny balan’ireo miaramila ka maty tsy tra-drano ny roa fa ireo efatra ambiny kosa tafaporitsaka.

Tsy mbola fantatra mazava hatreto na dahalo na olona tsotra nandositra noho ny tahotra mpitandro filaminana fotsiny izy ireo. Ny fihetsik’izy ireo raha vao nahita ny mpampandry tany dia efa ampy ahiahiana azy ireo ho jiolahy nikasa hanao asa ratsy. Iray tamin’ireo namoy ny ainy no fantatra ny anarany sy ny mombamomba azy. Fantatra kosa fa tsy misy sahy mikitika ireo razana ny fokonolona any an-toerana.

Laurena Nany