Taorian’ny diosezin’Ambanja dia nihazo ny faritra Ihorombe indray ny ekipan’ny Cnaps sy ny ekipan-dry maompera Jules Ranaivoson nanohy ny filan-kevitry ny talen-tsekoly. Toy ny faritra maro teto Madagasikara dia lohahevitra ny hoe “Sekoly katolika miatrika ireo zo sy fiahiana ara-tsosialy”. Ihosy no diosezy faha – 7 nandray ny filan-kevitry ny talen-tsekoly raha nosantarina tany Antsirabe ary nihazo an’i Tsiroanomandidy, Antananarivo, Mahajanga, Port-Bergé, ary Nosy Be.

Nosafidiana hanana anjara amin’ny fampiofanana momba ny fiahiana ara-tsosialy sy ny mikasika ny Cnaps ireo talen-tsekoly katolika nandritra ny 2 andro voalohany, noho ny fahatsapan’ny foibe nasionaly katolika misahana ny fampianarana ny tsirambina misy amin’ny resaka fahaverezan-jon’ny mpiasa ao aminy. Tanjona kendrena nandritra ny fiofanana ny hananan’ireo tompon’andraikitry ny sekoly fahalalana momba ny lalàna manan-kery amin’izao fotoana izao. Rehefa mahafantatra mantsy ka mahafehy ireo mpitantana sekoly dia afaka manao fampiharana izany ary mitondra fanovana. Amin’izay dia tsy ho very zo intsony ireo mpampianatra eny anivon’ny sekoly katolika.

Nahatratra 3430 ny sekoly katolika no efa nahazo fiofanana tamin’ny Cnaps nandritra ity tetikasa ity, ary miisa 16 200 ny mpampianatra efa mahafantatra tsara ny fiahiana ara-tsosialy .