Lehilahy iray no hita faty tany amin’ny kaominina Vinanivao, ny talata maraina lasa teo. Efa herinandro mahery io lehilahy io no tadiavina tao an-tanàna fa tsy nahenoina vaovao mihitsy. Nandeha namonjy alim-pandihizana notanterahin’i Jean Aimé teo ampitan’ny tanàna no nialana tao Vinanivao ary io tsy niverina io intsony. Fantatra fa mpiavy io lehilahy io, izay mpampianatra ao an-toerana.

Natao ny fikarohana azy fa tsy nisy vokany. Araka ny loharanom-baovao dia efa nijanona tsy nitady azy ireo fokonolona no hita navalan’ny rano ny fatiny izay roa andro talohan’ny nahitana ny bisikiletany teo amoron-drano. Ahiana ho nisy namono io mpampianatra io vao natsipy teny anaty rano. Rakotra diana zava-maranitra sy mangana ny vatany. Ny mahagaga anefa tsy nalain’ireo mpamono ilay bisikileta. Mety ho lonolono tsotra izao no antony nanaperana ny ain’ity lehilahy ity.

Efa simba tanteraka ny razana tamin’ny fahitana azy ary efa namoaka fofona. Raha ny vaovao voaray hatrany dia tsy nandrasana intsony ny razana fa rehefa vita ny vatam-paty, nalevina avy hatrany ny androtr’io talata io ihany. Misokatra ny fanadihadiana ataon’ny mpitandro filaminana.