Ho fanamafisana ny fandriampahalemana  ao amin’ny tananan’i Fianarantsoa sy ny manodidina dia nanao fisavana ireo fiara rehetra mivezivezy any an-toerana ny polisim-pirenena. Nandritra izany indrindra no nanatanterahana fisavana tamin’ny kamiao iray mampitohy an’i Toliara sy aty an-drenivohitra, ny faran’ny volana oktobra lasa teo, tokony ho tamin’ny 3 ora sy fahefany tokalandro.

Saron’ny polisy mpanao barazy tamin’izany fotoana izany ny rongony 47 gony, izay milanja 611 kilao, teo Ankofafa, niaraka tamin’ilay mpamily izany fiara vaventy izany. Tamin’ny fanadihadiana natao azy no nahalalana fa avy any Toliara ireo zava-mahadomelina ireo ary nokasaina entina hiakatra aty an-drenivohitra fa izao tratra izao ary niaiky izy fa azy ireo entana ireo.

Taorian’ny famotorana dia natolotra ny fampanoavana tany an-toerana ny alatsinainy 2 novambra lasa teo io lehilahy mpamily io ary naiditra am-ponja vonjimaika. Nodorana avy hatrany kosa ireo rongony tratra ireo taorian’ny fahazoan-dalana avy tamin’ny fitsarana.

Laurena Nany