Taorian’ny fihainoan’ny mpanao famotorana ireo olona am-polony mahery mikasika ny vono olona niseho tany Soanierana Ivongo, ny talata lasa teo, dia nampidirina am-ponja any Ambalatavoahangy ny telo lahy izay tena tompon’antoka tamin’izany. Ny alarobia teo izy ireo no niakatra fitsarana ary niaiky ny heloka vitany. Noho ny fisalasalana sy ny tsy fahampian’ny vesatra niampangana ireo ambiny kosa dia navotsotry ny fitsarana ireto farany.

Mpirahalahy niady tany no fantatra fa nahatonga ny raharaha. Araka ny loharanom-baovao akaiky ny maty dia resy ny iray tamin’izy roa rehefa nandalo fitsarana izany. Tezitra noho izany ilay voalaza etsy ambony ka nandrasany  niaraka tamin’ny namany efa am-polony mahery, tany anaty ala izay misy ny fiasany any Sahave ilay rahalahiny. Tamin’io fotoana io tsy nandeha irery ilay lasibatra fa niaraka tamin’ny lehilahy roa hafa. Novonoin’ireo olona maro avy hatrany  tamin’ny fomba feno habibiana ny roalahy fa ilay fahatelo tafaporitsaka. Natahotra ny ho toriana ireto mpamono olona ka izy ireo indray no tonga aloha tany amin’ny zandary. Nanambara izy ireo fa nahatratra dahalo nangalatra jirofo ka novonoiny. Rehefa natao anefa ny fanadihadiana, tratra ny laingan’izy ireto, sady ilay fahatelo tsy maty nijoro vavolombelona  rahateo.

Laurena Nany