Nivoaka omaly ny didim-pitsarana mahakasika ilay lehilahy 50 taona mampihorohoro iny Faritra Vakinakaratra iny ka sazy 52 taona an-tranomaizina no azony. Malaza amin’ny resaka fanolanana sy famonoana olona ary fanafihana mitam-piadiana entina ampitahorana ireo lasibatra.

Toarian’ny fitarainana maro voarain’ny mpitandro filaminana tany an-toerana dia nandeha ny fikarohana azy io ka ny taona 2010 no voasambotra ny lehilahy ary notazomina am-ponja vonjimaika tany amin’ny distrikan’Ambatolampy mandra-pahatongan’ny fotoana hitsarana azy.

Niaiky ny fiampangana rehetra notazomana azy ilay rangahy nandritra ny famotorana natao taminy manoloana ny fitsarana. Araka izany ary dia voasazy 20 taona an-tranomaizina izy noho ny famonoana olona, 17 taona kosa tamin’ny fitazomana fitaovam-piadiana tsy nahazoana alalana ary 15 taona noho ny fanolanana. Raha atambatra ireo rehetra ireo dia any amin’ny faha 102 taonany any izy vao mivoaka ny fonja.

Laurena Nany