Mitohy ny fanentanana ataon’ny Cnaps eny anivon’ny orinasa mba ahafahan’ny mpiasa tsirairay misitraka ny zony. Ankoatra izany, ny herinandro lasa teo dia niara-nisalahy ireo fianakaviam-ben’ny Tahirim-pirenena izay notarihin’i Raoul Arizaka Rabekoto, tale jeneralin’ny Cnaps, nanome rà ho an’ny mpiray tanindrazana aminy. Tetsy amin’ny trano fiasan’izy ireo tetsy amin’ny ivotoerana ara-pahasalamana tetsy Ampefiloha no nanaovana ity asa fanasoavana ity. Tanjona ny hanampiana ireo marary tsaboina sy didiana etsy amin’ny Hjra toy ireo olona niharan-doza tampoka, ny mararin’ny homamiadana ary indrindra ireo vehivavy miteraka izay mila famonjena amin’ny rà etsy amin’ny Sainte-Fleur.

« Izay manome rà rahateo manome aina » hoy ireo mpiasa ka ho famonjena ny malagasy izay tsy ampy rà sady adidy amin’ny maha-olom-pirenena malagasy amin’ny lafiny ara-pahasalamana no nanentanana ireo mpiasan’ny Tahirim-pirenena hanome rà maimaim-poana. Mahatratra an-jatony mahery ireo mpiasa nanome rà.  Nialoha ny fanomezan-drà dia nohazavaina tamin’ireto farany ny fomba atao alohan’ny hakana rà toy ny tsy fahazoana misotro alikaola, tsy fahazoana misakafo ary olona salama tsara feno 18 hatramin’ny 60 taona.