Taolam-paty dimy kitapo no hitan’ny fokonolona teny amoron-dalana, teo anelanelan’ny kaominina Alarobia sy Carion, ny talata hariva, tamin’ny 7ora. Miisa 559 ireo taolana ary nafatratra tao anaty sakaosy izay nahitana taolan-tsandry sy fe ary ranjo. Mbola tsy fantatra ny fasana nakan’ny mpangalatra ireo taolana satria tsy naharay fitarainana mikasika vaky fasana ny tompon’andraikitra any an-toerana. Tonga nanao fizahana ireo taolam-paty ny mpitandro filamina ary ireo tompon’andraikitra kosa nanao antso avo amin’ny fianakaviana izay mety ho tompon’ireo taolana ireo.

Najanona ao amin’ny biraon’ny zandary any amin’ny kaominina Alarobia ireto taolana amin’izao fotoana izao mandra-piandry ireo tompony haka izany fa nanamafy kosa izy ireo fa tsy maintsy handray fepetra raha tsy miseho ireo fianakaviana amin’ity andro anio ity. Tsy maintsy alevina ireo taolana ireo rehefa tsy misy olona manao fampilazana momba ny fahavakisana fasana. Efa mandeha ny famotorana ataon’ny zandary.

Laurena Nany