Nahitam-bokany ny hetsika “limitrophe” izay ataon’ny zandary any Ambilobe amin’ ny famongorana ny asan-dahalo, indrindra amin’ny halatra omby. Tao anatin’ny tapa-bolana mahery nisian’ny hetsika, izay nanaovana savahao ireo faritra mampisaraka ny distrikan’Ambilobe sy Vohémar dia dahalo 10 indray no voasambotra ny talata lasa teo, tany Ankaramy, ary omby zato mahery no nogiazana. Mbola nahitana basy vita gasy sy fitaovana hafa ihany teny amin’ny iray tamin’ireo jiolahy izay entina manao ny asa ratsy. Fantatra fa tao Ankaramy no tena nampihorohoroan’ny dahalo matetika izay nahasamborana azy ireo tao an-toerana niaraka tamin’ireo omby tsy nisy taratasy ireo. Saika niharan’ny fitsaraham-bahoaka noho izany ny roa tamin’ireo dahalo raha vao fantatry ny fisamborana ireo olon-dratsy nampitondra faisana azy ireo hatrizay. Tafaporitsaka ry zareo ary nifanenjahana hatrany Ankatoko. Ho atolotra ny fampanoavana any Antsiranana tsy ho ela izy 10 mirahalahy voasambotra ireo.