Mitohy hatrany ny herisetran’ireo mpitandro filaminana manoloana ny olona izay sendra azy ireo. Tovolahy iray 19 taona no miady amin’ny fahafatesana amin’izao fotoana izao, any amin’ny hopitaly Besopaka ao Sambava, rehefa niharan’ny herisetran’ny polisy sy ny zandary nandritra ny famotorana azy. Miasa mandray mpanjifa ao amin’ny trano fandraisam-bahiny iray any amin’ny kaominina Farahalana, distrikan’i Sambava ity tovolahy ity raha voaendrikendrika nangalatra vola mitentina 3 tapitrisa ariary sy finday an’ireo mpanjifa tao.

Folaka mantsy ny tanany sy ny tongony ary raparapa be ny tarehiny nanaovan’ireo mpitandro filaminana azy. Fantatra mantsy fa notazomina tao amin’ny zandary izy avy eo nafindra teny amin’ny biraon’ny polisy natao fanadihadiana mahakasika io halatra io. Rehefa tena zohina akaiky anefa ny raharaha dia tsy io tovolahy io no nanao ny asa ratsy fa lehilahy iray hafa miara-miasa aminy tao ihany. Nametraka fitoriana eny amin’ny fitsarana ny havan’ilay tovolahy amin’izao fotoana izao manoloana ny tsy rariny nataon’ireo mpitandro filaminana ny zanany. Andrasana ny fivoaran’ny raharaha.

Laurena Nany