Nisesisesy ny loza nateraky ny kodiaran-droa, ny alin’ny alakamisy hifoha zoma lasa teo, tany Sambava Centre. Olona iray no maty tsy tra-drano ary telo hafa kosa naratra mafy ary mbola manaraka fitsaboana any amin’ny hopitaly amin’izao fotoana izao.

Niseho tokony tamin’ny 9 ora alina tany ho any ity tranga ity. Môtô nanao taingin-droa sady tsy nanao aroloha ireo olona teny amboniny no mbola niromorimo tsy nisy ohatr’izany satria nikasa hisongona fiara marika Renault 4 no tra-doza. Teo am-pisongonana indrindra ilay fiara no nikasoka ny sisiny ilay kodiaran-droa ka nipitika avy hatrany izy roa teo amboniny. Noho ny dona mafy be nahazo azy roalahy dia naratra mafy ary atahorana ny ain’izy ireo. Ny iray tamin’izy ireo, izay zanaka mpandraharaha any an-toerana, voatery nalefa haingana aty amin’ny hopitaly aty an-drenivohitra, omaly maraina tamin’ny 7 ora, niaraka tamin’ny fiaramanidina mba hahazo fitsaboana sahaza azy.  Adiny roa talohan’io indray dia môtô nanao taingin-droa no tra-doza, tao Sambava Centre ihany. Fantatra fa nidona tamin’ny fiara 4L, izay nijanona teo amoron-dalana izy ity, vokatry ny fandehanana mafy hatrany. Nipitika roa metatra niala ny toerana nisehoan’ny loza ary maty teo no ho eo ilay nitondra ilay kodiaran-droa. Nanao aroloha ihany ity farany saingy tsy nahatana ny aina izany. Ilay olona nentiny kosa naratra mafy ary mbola manaraka fitsaboana ao amin’ny hopitaly any an-toerana.

L.N