Taorian’ny fihainoan’ny fampanoavana an’i Kohen Rivolala, ilay mpitondra fivavahana,  dia naiditra am-ponja vonjimaika  any Miandrivazo izy io miandry ny fotoana hitsarana azy. Tsy vitan’izany fa mbola notapahana ihany koa ny volony taorian’ny fivorian’ny Omc tany an-toerana fa mbola tsy fantatra mazava ny antony nanaovana izany. Ny feo mandeha anefa no milaza fa ao amin’io volony no misy hery hafahafa izay mahatonga ny aretina toratorana atao hoe ambalavelona mahazo ireo zazavavy any Miandrivazo, fa tsy fantatra ny fahamarinany. Ho fiarovana ny ainy, mba tsy iharan’ny fitsaram-bahoaka, no antony nampidirana azy am-ponja ary ambenana fatratra io toerana io amin’izao fotoana izao. Raha tsiahivina, nahatratrarana zavatra hafahafa mahatonga ny ambalavelona no nitorian’ny ray aman-drenin’ny mpianatra azy. Ary tamin’ny fisamborana an’ity mpitondra fivavahana ity  dia mbola tratra teny aminy ireo zavatra mampiahiahy ireo. Araka ny loharanom-baovao avy any an-toerana ihany, nihetsika avokoa ny aretin’ireo ankizivavy mpianatra nandritra ny fisamborana azy. Nampitraotra ny fokonolona izany ka nahatonga azy ireo nankeny amin’ny biraon’ny polisy nitaky ny hanaovana ny fitsaram-bahoaka.

Laurena Nany