Lehilahy miisa 3 malaza ratsy amin’ny fanaparitahana rongony, monina amin’ny tokantrano samy hafa eny Tongarivo, kaominina Tanjombato, no voasambotry ny zandary ny alakamisy lasa teo.

Ny fandrenesana fa misy olona telo lahy mampiahiahy, vaovao avy amin’ny olona tsara sitrapo, no nahafahanan’ny mpitandro filaminana avy eny Andoharanofotsy nisambotra azy ireto rehefa nahazo fahazoan-dalana hisava ny trano fonenan’izy ireo avy tamin’ny fitsarana. Vovona rongony mitotaly 650 grama efa voafono tsara sy vonona hitadiavana mpividy no saron’ny zandary nandritra ny fisavana ny tranon’ireo telo lahy ireo.

Ankoatra izay dia mbola nisy ihany koa nafenina teny an-tanimbary mba tsy ho hitan’ny mpiara-monina. Niaiky ny heloka vitany izy telo lahy  nandritra ny fanadihadiana natao tamin’izy ireo. Hiakatra fitsarana tsy ho ela ny raharaha.

Manoloana ny fahombiazan’ny fiaraha-miasa tahaka izao dia manentana ny olona hatrany ny mpitandro filaminana mba hampandre azy ireo rehefa mahita na mahatsikaritra zavatra hafahafa mahakasika zava-mahadomelina na zavatra mampiahiahy tsotra izao entina hamongorana ireo mpanao ratsy.

L.N