Toeram-pivarotana iray no lasibatray ny andian-jiolahy mirongo fitaovam-piadiana ny sabotsy lasa teo, tokony tamin’ny 7ora hariva, teny Ambodimita. Vatan-dehilahy miisa 4 no nanantanteraka ny fanafihana. Nirefodrefotra ny basy nandritra ny fandalovan-dry zalahy teny an-toerana. Nandrahona ireo mpivarotra izy ireo ka lasa ny vola 1 tapitrisa ariary sy ny fahana mitentina 140 000 ariary tao amin’ilay toeram-pivarotana.

Rangahy iray voan’ny bala

Mampihorohoro ny  manodidina amin’ny alalan’ny fanapoahana basy sy tifi-danitra indray ireo olon-dratsy rehefa miala ny toerana avy norobainy ka nahavoa lehilahy lehibe iray manodidina ny 50 taona. Voa teo amin’ny tongony ary naratra mafy ilay mpandeha an-tongotra sendra nandalo tamin’iny toerana iny. Tsy misy ahiana kosa ny ainy.

Tsapa  fa miha-mahazo vahana indray ny fanafihana toeram-pivarotana amin’izao ankatoky ny fety izao. Ary mbola manampy trotraka izany koa ny afitsok’ireo mpanao trafikana basy, izay mahafaty ireo olona izay sendran’ireo jiolahy tsy mitsitsy. Efa misokatra ny fanadihadiana.

Laurena Nany