Lehilahy lehibe 61 taona, no maty notifirin’ireo jiolahy, raha iny naka rivotra teo amin’ny lavarangana, tany Ambodimanga, distrikan’i Tsaratanana, ny alin’ny zoma lasa teo. Efa fahazarany no maka rivotra tahaka  izao  alohan’ny hatory. Tonga avy any lehilahy miisa 8 nirongo fitaovam-piadiana, izay tsy nampoizina mihitsy. Tsy fantatra kosa na nikasa hanafika azy na tokantrano mpifanila-bodirindrina aminy fa vantany vao nahita azy ireo olon-dratsy dia norarafin’izy ireo tifitra ity lehilahy lehibe ary nandositra izy ireo avy eo. Ireo fokonolona ihany koa tsy nanam-po na inona na inona fa efa feo basy nirefotra no nanaitra azy ireo.

Raikitra avy eo ny fanenjehena ireo jiolahy saingy very lalana ireo mpanara-dia ka tsy hita intsony izay nalehan’ireto olon-dratsy. Nisy kosa ireo nampandre ny mpitandro filaminana ka nidina tao an-toerana ireto farany nanao ny fizahana ary tamin’izany no nahitana diam-bala roa teny amin’ny vatan’ilay rangahy izay nitarika ny fahafatesany . Misokatra ny fanadihadiana.

L.N