Nitrangana toe-javatra mampalahelo tany amin’ny kaominina Vinanivao, distrikan’Antalaha, ny marainan’ny alatsinainy 14 desambra lasa teo. Zavavavikely vao 10 taona monja no nodidian’ny renibeny fivaviana tamin’ny antsy. Vokany, torana tsy nahatsiaro tena ilay zaza ka nifamonjena nentina tany amin’ny hopitaly. Ora maro taty aoriana vao niverina ny ain’ilay zaza ary rehefa nanontaniana dia nanambara fa ny renibeny ihany no nahavanon-doza. Nanda mafy kosa ity farany ary nilaza fa mandainga ity ankizy. Nampandre ny mpitandro filaminana tany an-toerana ny ray aman-drenin’ilay zaza ka nosamborina avy hatrany ilay ramatoa be. Araka ny loharanom-baovao dia nitaiza azy efa hatramin’ny fahakeliny io renibeny avy amin’ny rainy io. Tsy fantatra kosa ny nahatonga ity ramatoa be nandidy antsy ny maha-vehivavy ny zafikeliny. Mahakasika ilay zaza kosa dia ahiana mafy ny toe-pahasalamany amin’izao fotoana izao. Voatery tsy maintsy alefa any an-tampon-tanànan’Antalaha mantsy ity zazavavy hanaraka fitsaboana. Ny olana anefa, tsy manana vola ho entina mitsabo azy ny ray aman-dreniny ka mbola miandry ny fiantran’ny olona hanome izay voatsirambin’ny tanana  hitondrana io zaza io.

Laurena Nany