Ankizy mianadahy 7 taona sy 8 taona no namoy ny ainy nilatsahan’ny varatra tany amin’ny fokontany Maroby Ikongo ny alarobia lasa teo. Avy nianatra tao amin’ny sekoly fanabeazana fototra ireo zaza ireo ka teny an-dalana hody no izao niharam-boina izao. Nanoram-baratra be tany an-toerana tamin’io fotoana io ka izao nihafara tamin’ny namoizana ankizy izao. Nisy ihany koa olona hafa naratra voakasiky ny tselatra tany an-toerana tamin’io andro io. Efa ho andro maromaro izay dia nanomboka avy ny orana any amin’ny faritra atsimon’ny Nosy. Mahery vaika tanteraka izany ary miteraka fahasimbana eo amin’ny foto-drafitr’asa ka mampitaraina ny mponina. Any Bezaha izao dia misy tetezana tapaka amin’ny lalana mampitohy amin’i Benenitra ka voatery tsy maintsy miampita lakana sy manakarama mpibata entana ny olona. Tsy mbola nisy kosa ny fepetra maharitra noraisina mba hamerenana ilay tetezana amin’ny laoniny.