Tsy tery lalana tokoa ny ratsy amin’izao fasahiranana mianjady amin’ny firenena izao. Isan’ny hanatanterahan’ny sasany ny asa-ratsiny indray amin’izao fotoana izao ny fisolokiana amin’ny alalan’ny taratasim-bola na « chèque » sandoka izay hamitahany ny tranombarotra izay sendra azy. Orinasa iray mpivarotra kodiaran-droa eny Ankorondrano no voafitaky ny lehilahy karana iray tamin’ny alalan’ny taratasim-bola sandoka  volana maromaro lasa izay. Rehefa vita ny fifampivarotana dia naseho tany amin’ny banky ilay « chèque » ary teo no nahafantarana fa sandoka ilay izy. Lasan’ilay olona araka izany ny môtô izay mitentina maherin’ny 16 tapitrisa ariary.

Sarona teny amin’ny lehilahy iray hafa anefa io kodiaran-droa io, omaly maraina, teny amin’izany orinasa izany ihany. Ity farany izay tsy nanam-po na inona na inona fa handeha hikarakara ilay fitaovana no nahatongavany teny an-toerana. Araka ny filazany dia novidiany tamin’ilay karana ilay môtô. Tsy nanaiky izany kosa ny orinasa fa nogiazany avy hatrany ny entana. Nametraka fitoriana, noho izany, ilay milaza fa tompon’entana mba ahafahana maka ilay kodiaran-droa. Misokatra ny fanadihadiana. Efa mandeha ihany koa ny fikarohana ilay mpisoloky.

Laurena Nany